Astara rayonunda karantin zərərvericilərinə qarşı mübarizə tədbirləri davam etdirilir

22-09-2018, 16:09
Oxunub: 41
Tüləgüvən kəndində sirayətlənmiş ərazilər mütəxəssislər tərəfindən nəzarətə götürülüb


Astara rayonunun Tüləgivən kəndində karantin zərərvericilərinə qarşı mübarizə tədbirləri davam etdirilir.

Kənd Təsərrüfatı Nazirliyindən Etatist.com-a verilən məlumata görə, Astaranın Tüləgüvən kəndində məhdud dairədə yayılmış karantin tətbiq edilən orqanizmlərlə sirayətlənmiş ərazilərin müəyyən edilməsi və mübarizə işlərinin həyata keçirilməsi istiqamətində fitosanitar tədbirlər həyata keçirilir.

Kənd Təsərrüfatı Nazirliyi yanında Dövlət Fitosanitar Xidmətinin Respublika Bitki Mühafizəsi Mərkəzinin yerli mütəxəssisləri tərəfindən bəzi torpaq mülkiyyətçilərinə məxsus sitrus bağlarında meyvə ağaclarının zərərvericilərlə sirayətlənməsinin müəyyən edilməsi istiqamətində müşahidələr davam etdirilir.

Dövlət büdcəsindən ayrılmış vəsait hesabına 36 hektar naringi bağlarında Kaliforniya qalxanlı yastıcasına (Quadraspidiotus perniciosus Comstosk) qarşı, 28 hektar naringi bağında Avstraliya şırımlı yastıcasına (Icerya purchasi Mask.) qarşı Tiometoksam tərkibli Artiste (0,2 l/1 ha) və Abamektin tərkibli Abam (0,025 l/1 ha) preparatlarından, təsərrüfat subyektləri hesabına isə 200 hektardan çox naringi, Kinkan (Çin limonu) və limon bağlarında adıçəkilən yastıcalara qarşı Dimetoat tərkibli Korumagor 40 EC (2-2,5 l/1 ha), İmidokloprid tərkibli Konfidor və Veftnor preparatlarından istifadə edilməklə kimyəvi mübarizə aparılıb. Ancaq bir çox hallarda sahibkarlar tərəfindən kimyəvi mübarizənin vaxtının və preparatların düzgün seçilməməsi görülən tədbirlərin səmərəsini aşağı salıb ki, bu da sahələrin zərərvericilərlə sirayətlənməsi üçün münbit şərait yaradıb.

Artıq Tüləgüvən kəndində sirayətlənmiş ərazilər Astara rayonu Bitki Mühafizəsi Mərkəzinin mütəxəssisləri tərəfindən nəzarətə götürülüb və torpaq mülkiyyətçilərinə zərərvericilərə və xəstəliklərə qarşı mübarizə tədbirlərinin düzgün aparılması üçün müvafiq tövsiyələr verilib. 
Şərhlər : 0 Şərh yaz
Şərhlər administrasiya tərəfindən yoxlanıldıqdan sonra əlavə ediləcəkdir. (Oxucuların diqqətinə çatdırırıq ki, dini, milli və irqi ayrıseçkilik məzmununda, həmçinin insan şərəf və ləyaqətini alçalda biləcək şərhlər əlavə edilməyəcəkdir.)
yenilə, əgər kod görünmürsə



Siz xəbər yaza bilərsiniz XƏBƏR YAZ
Xəbər lenti