Azərbaycanlı ata: "Oğlum Suriyada cihad edir"

13-05-2013, 18:57
Oxunub: 4301


Bir müddət bundan əvvəl ANS TV Suriya müharibəsində iştirak edən və döyüşlərdə öldürüldükləri iddia olunan azərbaycanlılar haqda məlumat vermişdi.

 

Həmin şəxslərin ailəsi övladlarının Suriyada olmasından xəbərsiz olduğunu və bunu yalnız televiziyada yayımlanan görüntülərdən öyrəndiyini bildirmişdi. Övladlarının taleyindən xəbərsiz olan valideynlər çox narahat idilər. "YouTube” internet portalında yenidən Suriya döyüşlərində azərbaycanlıların olduğu iddia edilən yeni video görüntülər yayılıb. 


Suriya mücahidlərinə qoşulan Rəşadın atası, Zəkəriyyə Məmmədov bunları deyib: "Bu mənim oğlumdur, Məmmədov Rəşad Zəkəriyyə oğlu. Hal-hazırda Suriyadadır, Suriyada cihad eləyir. Allah üçün, müsəlmanları müdafiə üçün cihad edir”. 

Nə qədər təəccüblü səslənsə də, Suriyada mücahid hərəkatına qoşulan Zaqatalanın Muxax kənd sakinlərinin valideynləri bu fikirdədir. 

Qeyd edək ki, Suriyada son vəziyyətlə bağlı "YouTube”da yayımlanan silahlıların döyüşdən əvvəlki andiçmə mərasimində Zaqatala sakinlərinin həmin silahlı birləşmələrin tərkibində olan görüntüləri yayılıb. Görüntülərdə övladlarının olduğunu təsdiqləyən valideynlər isə fefral ayının 14-də 4 nəfərin bu məqsədlə rayonu tərk etdiyini söylədilər. 

Azad Suriya ordusunun tərkibində cihad edən silahlı birləşmələrdə oğullarının iştirakını təsdiqləyən valideynlər bildirdilər ki, onlar övladları ilə internet vasitəsi ilə əlaqə saxlayırlar. Silahlı birləşmələrə rəhbərlik etdiyi deyilən rayon sakini Vahid Məmmədovun videosunda onun digər döyüşçülərə nisbətən fərqli geyimdə və üzərində daha çox silah-sursat olması da görünür. Valideynləri onun hərbi xidmətdə xüsusi bölmədə hava hücumundan müdafiə sahəsində qulluq etdiyini bildirdi. Ona məxsus hərbi biletdə də bu barədə rəsmi qeydiyyat aparılıb. 

Əldə etdiyimiz daha bir maraqlı fakt da odur ki, Vahid Məmmədov bir neçə il əvvəl hüquq-mühafizə orqanları tərəfindən Zaqatalada "Meşə qardaşları” ilə bağlı keçirilən xüsusi əməliyyatda da iştirak edib. Valideynləri bildirdi ki, Vahid Məmmədovdan martın 14-də axırıncı mesaj gəlib ki, "mən yaxşıyam”. Sonra səs sorağını eşitməsələr də, "YouTube”da görüntülərini izləyiblər. Silahlı birləşmələrə qoşulan Rizvan Süleymanovun anası isə oğlunun qısa müddətə işləmək adı ilə fevralın 14-də Bakı şəhərinə getdiyini deyir. Anası oğlunun işləmək adıyla evdən getdiyini söyləsə də, az sonra aydın oldu ki, o da Rizvanın qanlı döyüşlərdə iştirakından xəbərdardır: "Onlar müsəlmanlara qarşı vuruşmurlar, müsəlmanları müdafiə edirlər, ermənilərə qarşı, müsəlmanların düşmənlərinə qarşı vuruşurlar. Ayrı heç nə yoxdur orda, müsəlmanların xeyrinə vuruşurlar orda”. 

Qardaşı isə Rizvan gedəndən sonra onunla yalnız bir dəfə telefon əlaqəsi olduğunu dedi. Qeyd edək ki , Rizvan Süleymanov hərbi xidmətdə topçu olub.

Daha bir həmvətənimiz Rəşad Məmmədovun atası Zəkəriyyə Məmmədova isə nəinki oğlunun Suriyada silahlı birləşmələrə qoşulduğunu təsdiqlədi, hətta bu barədə əvvəlcədən tam məlumatlı olduğunu və oğluna bu işdə xeyir-dua verdiyini də söylədi. Atası bir neçə gün əvvəl də oğlu ilə internet vasitəsi ilə əlaqə saxladığını və deməsinə görə hər şeyin qaydasında olduğunu bildirib. Ata oğlunun haqq yolunu seçdiyini iddia edir. İnternet vasitəsi ilə Rəşadla mütəmadi əlaqə saxladığını deyən ata onu da bildirdi ki, oğlunun deməsinə görə, Azad Suriya ordusunun tərkibində çoxlu sayda azərbaycanlı var ki, onların da əksəriyyəti bu bölgənin sakinləridir. Digər həmkəndliləri ilə birgə döyüşlərə qatılan Qalibin atası isə oğlunun bu seçimindən narazı olduğunu və onun yoldaşlarının təsiri altına düşərək buna qərar verdiyini dedi. 

Rayon ağsaqqalları isə baş verənlərlə bağlı təəssüflərini bildirərək, yeniyetmə və gənclərin müəyyən təsirlər altına düşdüklərindən ciddi narahat olduqlarını və rayonda bununla bağlı lazımi tədbirlər görülməsinin vacibliyini söylədilər.


Şərhlər : 2 Şərh yaz
Agdas muselmanlari 2 avqust 2013 15:20  
Allah onlardan razi olsun insaallah
Narahat 15 fevral 2014 14:30  
Ay ogullarini Suriyaya gonderen dinden bixeber valideyinler, axi biz de muselmaniq, ermenini oldurmek uchun basa-basa burdan ora getmek lazim deyil ki, Qarabag burda, lap yaxinimizdadi,gonderin gedib orda torpaqlarimiz ugrunda cihad elesinler. Ay qafiller, oyanin, oyanin, oyanin
İnformasiya
Ola bilər ki, ancaq gün ərzində saytda xəbərlərə şərh əlavə etmək 600 nəşr günündən sonra olsun.
Xəbər lenti