Cüdo üzrə "Böyük Dəbilqə” turnirinə start verilib

23-02-2018, 19:11
Oxunub: 146
Boqdan Yadova uduzaraq yarışla vidalaşıb


Almaniyanın Düsseldorf şəhərində cüdo üzrə "Böyük Dəbilqə” turnirinə start verilib.
Report xəbər verir ki, üç gün davam edəcək yarışın ilk günündə qadınlar 3, kişilər 2 çəki dərəcəsində çıxış ediblər. 

Qadınların yarışında Azərbaycanı yalnız Aişə Qurbanlı təmsil edib. 1/16 final mərhələsindən mübarizəyə başlayan 48 kq çəkili cüdoçu ilk görüşündə ispaniyalı Culiya Figeroaya uduzaraq mübarizəni dayandırıb. 52 kq və 57 kq çəkilərdə azərbaycanlı xanım cüdoçu olmayıb.

Kişilərdən isə 60 kq çəkidə Vüqar Şirinli yarışıb. Mübarizəyə 1/16 finaldan qoşulacaq Şirinli ilk iki görüşündə almaniyalı Morits Plafki ilə özbəkistanlı Diyorbek Urozboyevi məğlub edib. Lakin 1/4 finalda yaponiyalı Ryuyu Naqayamaya məğlub olan azərbaycanlı cüdoçu təsəlliverici görüşdə braziliyalı Erik Takabatake ilə qarşılaşmadan da məğlub ayrılıb. Nəticədə o, 7-ci yerlə kifayətlənib.

Yeni - 66 kq çəki dərəcəsində çıxış edən Orxan Səfərovun ilk qarşılaşması 1/32 finala təsadüf edib. O, ardıcıl olaraq, filippinli Şugen Nakano və italiyalı Mateo Medvesi məğlub etsə də, 1/8 finalda ukraynalı Georgi Zantarayaya məğlub olub və mübarizəni dayandırıb.

Azərbaycanın bu çəkidəki digər təmsilçisi Nicat Şıxəlizadə isə 1/16 final mərhələsindən mübarizəyə qoşulub. O, elə ilk görüşdəcə ukraynalı Boqdan Yadova uduzaraq yarışla vidalaşıb.

Fevralın 24-də qadınlar 63 kq və 70 kq, kişilər 73 kq və 81 kq çəki dərəcələrində mübarizə aparacaqlar. Ertəsi gün isə qadınlar 78 kq və +78 kq, kişilər isə 90 kq, 100 kq və + 100 kq çəki dərəcələrində yarışacaqlar.

Qeyd edək ki, Azərbaycan yarışda 12 cüdoçu ilə təmsil olunur. Kişilərdən Vüqar Şirinli (60 kq), Nicat Şıxəlizadə və Orxan Səfərovdan (hər ikisi 66 kq) əlavə, Rüstəm Orucov, Hidayət Heydərov (hər ikisi 73 kq), Fəqan Quluzadə (81 kq), Tural Səfquliyev, Məmmədəli Mehdiyev (hər ikisi 90 kq), Elxan Məmmədov, Elmar Qasımov (hər ikisi 100 kq), qadınlardan isə Aişə Qurbanlı (48) ilə yanaşı, İrina Kindzerska (+78 kq) mübarizə aparacaq.
Şərhlər : 0 Şərh yaz
Şərhlər administrasiya tərəfindən yoxlanıldıqdan sonra əlavə ediləcəkdir. (Oxucuların diqqətinə çatdırırıq ki, dini, milli və irqi ayrıseçkilik məzmununda, həmçinin insan şərəf və ləyaqətini alçalda biləcək şərhlər əlavə edilməyəcəkdir.)
yenilə, əgər kod görünmürsə



Siz xəbər yaza bilərsiniz XƏBƏR YAZ
Xəbər lenti