"Kitab heç vaxt təbii ehtiyaca çevrilə bilməz" - Oxucudan müsahibə

15-06-2017, 12:22
Oxunub: 2546
"Kitabla içə-içə yaşayan, kitabı sevən hər kəs "Kitabıstan" vətəndaşıdır"


“Kitabıstan” oxucularla müsahibəni davam edir. Bu dəfəki müsahibimiz Azərbaycan Texniki Universitetinin tələbəsi Elçin Quluzadədir.

Etatist.com həmin müsahibəni təqdim edir:

- Kitab oxumaq nə zaman təbii ehtiyaca çevrilə bilər?
- Kitab heç vaxt təbii ehtiyaca çevrilə bilməz. Daha çox mənəviyyatla bağlı məsələdir. Çoxu vaxtının olmadığını deyir. Ancaq məişət problemlərindən qurtulduqdan sonra mənəviyyatı, ruhu qidalandırmaq haqqında düşünə bilər. 

- Mənəviyyatı qidalandırmaq ... maraqlıdır. Sizin ən sevdiyiniz “qida” hansı kitabdır?
- Real həyatlardan həqiqətləri əks etdirən kitabları daha çox sevirəm. Bioqrafik, klassik, ya da realizm üslubunda yazılmış romanlar da ola bilər.

- Kitablar cəmiyyətə yol göstərə bilərmi?
- Kitablar körpü rolunu oynayır, insanı bilgiləndirir. Daşlıqlarla, çayın arasıyla dağın o biri tərəfinə keçə bilərsən. Ancaq kitab insana bilgi verir, düşdüyü çətinliklərdə necə davranmalı olduğunu öyrədir. Körpü yoxdursa, anlayırsan ki, o körpünü biri tikməlidir, yoxsa digər gələnlər də keçə bilməyəcək.

- “Körpü olmağın” məsuliyyətini necə dərk edirsiniz?
- Dərk edirəm. Həmin anda həyati duyğulardan imtina etmək lazım gəlir... Digərləri daha yaxşı yaşasın deyə.

- Ən çox sevdiyiniz yazıçı kimdir?
- Cek London.

- Nəyə görə?

- Martin İdenin məqsədləri üçün apardığı mübarizə xoşuma gəlmişdi. O romandan çox şey öyrənmək olar. “Martin İden” həyatı dəyişən 10 kitabdan biridir. Hamıya oxumağı məsləhət görürəm. Hekayələrində isə təsvirləri o qədər gözəl yazıb ki, insan özünü hekayənin içində hiss edir. 

- Həmin yazıçının “Dəmir daban” romanındakı anti-utopik təsvirlər bizim cəmiyyətimiz üçün də keçərli ola bilərmi?
- Mən hesab etməzdim. Digər anti-utopik əsərlər daha çox yaxındı.

- Azərbaycan yazıçılarından kimləri oxuyursunuz?
- Öz yazıçılarımıza qərəzli yanaşmıram. Demək olar, əlimə fürsət düşdükcə əksəriyyətini oxuyuram.

- Bizim ədəbiyyat cəmiyyətimizə mənəvi qida kimi bəs edirmi?
- Hər kəsin mənəviyyatı eyni deyil axı. Ola bilsin ki, bəziləri üçün mənəvi qida olsun.

- Kitab oğurlamısınız?
- Vaxtilə oğurlamışam (gülür).

- Hansı kitabları?
- Nitşenin külliyatından 4 kitab olub. Albert Kamüdən bir kitab. Adlarını deyib deşifrə olmaq istəmirəm (gülür).

- Özünüzü “Kitabıstan” vətəndaşı hesab edirsiniz?
- Kitabla içə-içə yaşayan, kitabı sevən hər kəs “Kitabıstan” vətəndaşıdır.
Rəvan Cavid
Kitabıstan
Etatist.com
Şərhlər : 0 Şərh yaz
İnformasiya
Ola bilər ki, ancaq gün ərzində saytda xəbərlərə şərh əlavə etmək 600 nəşr günündən sonra olsun.
Xəbər lenti