Nazir yaralı hərbçilərə baş çəkdi

8-04-2016, 19:19
Oxunub: 195
"İgid Azərbaycan övladlarının ruhu qarşısında isə baş əyirik"


"İlham Əliyevin tapşırığına uyğun olaraq, yaralı hərbçilərimiz zəruri sosial müdafiə və bərpa xidmətləri ilə təmin olunacaqlar"

Azərbaycan Respublikasının əmək və əhalinin sosial müdafiəsi naziri Səlim Müslümov cəbhənin təmas xəttində ermənilərin təxribatının qarşısının alınması zamanı yaralanan və hazırda Müdafiə Nazirliyinin Mərkəzi Hərbi Klinik Hospitalında müalicə olunan hərbiçilərlə görüşüb. 

S.Müslümov onlarla söhbət edərək, onların səhhəti ilə maraqlanıb. Hərbi qulluqçular aparılan müalicə işi nəticəsində sağlamlıqlarının tədricən yaxşılaşmaqda olduğunu, sağaldıqdan sonra da yenidən hərbi hissələrinə qayıdaraq, Vətənə şərəfli xidmətlərini davam etdirəcəklərini vurğulayıblar. 

Nazir onlara tezliklə müalicə olunaraq sağlamlıqlarını bərpa etməyi arzulayıb: "Azərbaycan Ordusu, o cümlədən siz hərbçilərimiz düşmənin ölkəmizə silahlı təxribatı zamanı əsl rəşadət, qəhrəmanlıq nümayiş etdirdiniz, nəinki bu təxribatın qarşısını məharətlə aldınız, hətta işğal altında olan və hərbi baxımdan strateji əhəmiyyətli bir neçə strateji yüksəkliyi və yaşayış məntəqəsini işğaldan azad etdiniz. Azərbaycan Prezidenti, Ali Baş Komandan cənab İlham Əliyevin rəhbərliyi ilə Ordumuzun nə qədər gücləndiyini və bu gün Vətənimizin işğal altında olan hissəsini qısa bir müddətdə işğaldan azad etməyə qadir qüdrətli bir ordu olduğunu Siz yüksək səviyyədə sübut etdiniz. Buna görə də biz sizlərə minnətdarıq və hər birimiz sizinlə, bütün qəhrəman Azərbaycan hərbiçiləri ilə fəxr edirik. Vətənin müdafiəsində qəhrəmancasına həlak olaraq şəhidlik zirvəsinə yüksəlmiş igid Azərbaycan övladlarının ruhu qarşısında isə baş əyirik". 

S.Müslümov Azərbaycan Prezidenti İlham Əliyevin tapşırığına uyğun olaraq, yaralı hərbçilərimizin zəruri sosial müdafiə və bərpa xidmətləri ilə təmin olunacaqlarını diqqətə çatdırıb. Daha sonra nazirlik tərəfindən müvafiq reabilitasiya vasitələri, o cümlədən əlil arabaları, dirsəkaltı ağaclar, əsalar və s. hospitala təqdim edilib. Nazirliyin Protez-Ortopedik Bərpa Mərkəzinin müvafiq hallarda yaralı hərbiçilərin dayaq-hərəkət funksiyalarının bərpası üçün onların protez-ortopedik məmulatlarla təmin etməyə hazır olduğu qeyd olunub. 

S.Müslümov yaralı hərbiçilərimizin tezliklə şəfa taparaq sağalacaqlarına əminliyini ifadə edib: “Bu hospital ən müasir tibbi potensialı, peşəkar həkim personalı ilə seçilir və yaralı hərbiçilərimizin qısa zaman içərisində sağalmaları üçün çox səmərəli müalicə işi aparılır”.
Şərhlər : 0 Şərh yaz
Şərhlər administrasiya tərəfindən yoxlanıldıqdan sonra əlavə ediləcəkdir. (Oxucuların diqqətinə çatdırırıq ki, dini, milli və irqi ayrıseçkilik məzmununda, həmçinin insan şərəf və ləyaqətini alçalda biləcək şərhlər əlavə edilməyəcəkdir.)
yenilə, əgər kod görünmürsə



Siz xəbər yaza bilərsiniz XƏBƏR YAZ
Xəbər lenti