"Azərsu" Koreya şirkəti ilə müqavilə bağladı

5-04-2016, 14:49
Oxunub: 589
Tullantı suları təmizlənərək kənarlaşdırılacaq


Aprelin 5-də  Azərbaycan Respublikası hökuməti və Koreya Respublikası İxrac-İdxal Bankının birgə maliyyələşdirdiyi “Pirşağı Çirkab Su Təmizləyici Qurğusu” layihəsi üzrə podrat müqaviləsinin imzalanma mərasimi keçirilmişdir. Müqavilə “Azərsu” ASC ilə  beynəlxalq  tenderin qalibi Koreya Respublikasının “Hansol” EME Co LTD şirkəti arasında imzalanıb.

İmzalanma mərasimində “Azərsu” ASC-nin sədri Qorxmaz Hüseynov ölkə əhalisinin keyfiyyətli və fasiləsiz içməli su, həmçinin kanalizasiya xidmətləri ilə təmin olunmasını Prezident İlham Əliyevin daim diqqətdə saxladığını və bəzi layihələrin beynəlxalq maliyyə qurumları ilə birgə reallaşdırıldığını qeyd etmişdir: “Bu sahədə Koreya Respublikasının maliyyə qurumları və şirkətləri ilə əməkdaşlıq xüsusi qeyd edilməlidir. Koreya Beynəlxalq Əməkdaşlıq Agentliyi ilə birgə həyata keçirdiyimiz layihə çərçivəsində qısa müddətdə Kürdəxanı qəsəbəsinin içməli su təchizatı sistemi yenidən qurulmuşdur. Növbəti qrant layihəsi çərçivəsində Beyləqan rayonunun Xocavənd qəsəbəsində su təchizatı və kanalizasiya sisteminin yaradılması layihəsi icra olunacaqdır. Pirşağı qəsəbəsinin yaxınlığında tikiləcək çirkab sutəmizləyici qurğunun tikintisi Abşeron yarımadasının kanalizasiya infrastrukturunun inkişafına töhfə verəcəkdir”.

“Hansol” EME Co LTD şirkətinin vitse-prezidenti Hi-Jun Cho Azərbaycanda həyata keçirilən su və kanalizasiya layihələrində iştirakdan məmnunluğunu ifadə edib, layihənin qısa müddətdə və keyfiyyətlə icra edilməsi üçün bütün imkanlardan istifadə olunacağını bildirib. 

"Pirşağı Çirkab Su Təmizləyici Qurğusu" layihəsi çərçivəsində sutkalıq məhsuldarlığı 40 min kubmetr olan müasir tipli bioloji tullantı təmizləyici qurğu tikiləcəkdir. Müasir standartların tələblərinə uyğun olaraq  qurğunun qapalı rejimdə layihələndirilməsi, yarana biləcək qoxunun neytrallaşdırılması üçün xüsusi biosüzgəclərdən istifadə olunması nəzərdə tutulur. Pirşağı çirkab sutəmizləyici qurğusunun tikintisi  Xəzər dənizinin ekoloji təhlükəsizliyinin qorunmasına böyük töhfə verəcəkdir. Yeni qurğu istismara verildikdən, ətraf qəsəbələrdə kanalizasiya infrastrukturu yaradıldıqdan sonra Abşeron yarımadasının şimal-şərq hissəsində böyük bir ərazidə yaranan tullantı sularının birbaşa Xəzər dənizinə axıdılmasının qarşısı alınacaqdır. Gələcəkdə Pirşağı, Kürdəxanı, Məhəmmədi, Nardaran, Digah, Maştağa və digər yaşayış məntəqələrinin tullantı suları bu qurğuda təmizlənərək kənarlaşdırılacaq.

Podrat müqaviləsi üzrə tikinti-quraşdırma işlərinin 2016-cı ilin III rübündə başlanıması və 2018-ci ildə yekunlaşması planlaşdırılır. Qeyd edək ki, “Pirşağı Çirkab Su Təmizləmə Qurğusu” layihəsinin maliyyələşdirilməsi üçün Koreyanın İxrac-İdxal Bankı 43,5 milyon dollar kredit ayırmışdır və bununla bağlı kredit sazişi 2014-cü ildə imzalanıb.
Şərhlər : 0 Şərh yaz
İnformasiya
Ola bilər ki, ancaq gün ərzində saytda xəbərlərə şərh əlavə etmək 600 nəşr günündən sonra olsun.
Xəbər lenti