“Təbii ki, başqan olacağam, Müsavatın tarixinə bu düşəcək“

10-12-2012, 11:39
Oxunub: 1825
“Səmimiyyət seçicilərin səsini mənə qazandıracaqsa, mən səmimi olaram.”


"Əgər gəncsənsə, təcrübəsizsən. Bu, partiyada da var"

Bu bizim yeni layihəmizdir. Ölkədə bütün Gənclər Təşkilatlarının rəhbərlərini oxucularımıza daha yaxından tanıtmağı nəzərdə tutub.

Biz onu sərt bəyanatlardan, etiraz aksiyalarından tanıyırıq. Yaxından tanıdığımız kimi, oxucularımızada yaxından tanıtmaq istədik. "Gənclər” rubrikamızın bu gün ki, qonağı Müsavat Partiyasının Gənclər Təşkilatının sədri Tural Abbaslıdır.


-Məni ilk öncə maraqlandıran odur ki, necə oldu siyasi proseslərə qoşuldun. Necə oldu məhz Müsavatı seçdin?

-Ümumiyyətlə hər sənəti seçməyin bir tarixi var. Mən uşaqlıqdan bağçada, məktəbdə, məhlədə çox aktiv uşaq olmuşam. Hansısa qruplar olanda təsadüfdənmi, nədənmi bilmirəm amma təşkilatçı olmuşam. Həmişə istəmişəm ki, gedişatlara təsir etmək imkanım olsun. Buna görə, Azərbaycanda ümumiyyətlə həyatda proseslərə təsir etmək imkanı olan yeganə ixtisas növü siyasətdi. Yeganə arenadı ki, bütün hallara, hadisələrə təsir imkanın var. O, qədər çoxdan olub ki heç xatırlamıram necə olub gəldim. Müsavatı seçməyə ailəmin təsiri olub. Bizim ailəmiz Müsavatçı olub. Mənim babam, anamın atası Müsavatçı olub. Anamın özü "Bərpa Qurultayının üzvü olub 1992-ci ildə. O, vaxtdan elə biz, Müsavat eşidə-eşidə gəlmişik. Hətda o vaxt Müsavatın tarixini bilməsək də, yəni məlumatımız çox az olsa da, üzv olmaq istəyirdik. Mən, 15-16 yaşımdan müraciət etmişdim üzv olmaq üçün. Onda yaşımız buna imkan vermirdi. Təklif olunurdu ki, Müsavata bağlı gənclər təşkilatları var, hələlik orda fəaliyyət göstərim. Ancaq mən Müsavata üzv olmaq istəyirdim. Bilmirəm təsadüfdür, nədir düz 18 yaşım olan günü Müsavata yazılmışam. 2000-ci il sentyabrın 13-ü. Partiya biletimdə də, belə qeyd olunub qəbul tarixim. Bundan sonra geniş siyasi fəaliyyətlərə qoşulmuşam, bəlli bir yaşdan sonra məlumatımız artırdı, tarixə, keçmişə, Azərbaycana dair. Azərbaycanın hər səhifəsində, hər addımında Müsavat var. Deyir Bakının harasını qazsan neft cıxar. Azərbaycan tarixinin də harasına baxsaniz Müsavat çıxacaq. Müsavat Partiyasının özü Azərbaycan Cumhuriyyətindən belə böyükdür. 1911-ci ildə Müsavat yarandı, 1918-ci ildə Cumhuriyyət. Bu partiyaya keçməyib hara keçəcəyik, yəni başqa alternativ varmı ki, müqayisə edək, niyə bunu yox bunu? Bəzi gənc dostlarımız olur görürsən ki, hansısa partiyaya 1 ya 2 ildi üzv olub. Seçim məni çox təəccübləndirir ki, ilk seçim şansın olanda niyə Müsavatı qoyub başqasını seçirsən? Yəni məntiqi anlayış mənə çatmır ki, siyasətdə Müsavatı qoyub başqa bir partiyanı seçmək olarmi? nəyisə seçəcəksənsə ən güclünün, ən şanslının tərkib hissəsi ol. Ancaq mən bu gün fəxr edirəm ki, kimsə Müsavatı araşdıranda Tural adına rast gələcək, Turalı araşdıranda Müsavata rast gələcək. Bunu da özümün nailiyyətim hesab edirəm.
-Universitetdə oxuyanda üzv olmusan, ya hələ məktəbdə oxuyurdun?

-Universitetə yeni başlamışdım, 2000-ci il sentyabr ayı idi.

-Parlament seçkiləri ərəfəsi idi deyəsən.

- Bəli, o ərəfədə Müsavat seçkilərə lap sonda buraxıldı. Yəni mən özümü biləndən Müsavata üzv olmuşam. Ora yazılmağım rəsmi bir şey idi. Ondan öncə mən mitinqlərdə, aksiyalarda iştirak etmişəm.

-Universitetə girəndə necə oldu, Müsavatın tarixi, fəaliyyəti barədə nəsə araşdırdınmı?
-Mən Universitetə girəndə Müsavat barədə bilməli olduğum hər şeyi bilirdim. Müsavat nədi, tarixi nədi, M.Ə.Rəsulzadə kimdi. Bizim uşaqlığımız o dövrə düşüb ki, başımızın üstündə məktəbdə Rəsulzadənin şəklini asırdıq. Dilimiz türk dili adlanırdı. Yəni tam milli sayılan bir dövrdə idik. Yadımdadı mən pioner ola bilməmişdim, oktyabrist olmuşdum, amma 2 ay sonra o ulduzları tapdalayırdıq yerə atıb. Halbuki müəllim tapşırmışdı ki, dərsə ulduzsuz gəlməyin. Milli ruh o dərəcədə inkişaf etmişdi.

-Milli ruh inkişaf etmişdi, ya şüara, emosiyaya təslim olmuşdunuz?

-Bu həmişə belədi də, milli ruh birinci şüardan, pafosdan irəli gəlir. Siyasətdə var düşünənlər, idarə edənlər, birdə var kütlə. Biz kütlə idik. Belə də olmalı idi, hamı siyasətlə məşğul olmalı deyildiki. Əkinçi, biçinçi, müəllim kim olacaqdı? Təbii ki, o dövrdə pafos var idi.
-Mənə T.Abbaslının xarakteri maraqlıdır. Turalın xarakterinin formalaşması Azərbaycanın müstəqillik dövrü, yeniyetməlik dövrü isə siyasi balans olan dövrə təsadüf etdi. Mənə maraqlıdır ki, T.Abbaslınin İ.Qəmbəri seçməyinə səbəb nə idi?
-Mən bayaq da qeyd etdim ki, mənim seçimim İ.Qəmbər deyil, Müsavat partiyası idi. Mən, Müsavatın adına, tarixinə, onun mübarizəsinə vurulmuşam.
-Yəni şəxsiyyətə pərəstiş yoxdur?

-Nəinki mən, Müsavatda olan 80% adamda şəxsiyyətə pərəstiş yoxdur. Amma təbii ki, həm partiya olaraq güclüyük, həm də lider olaraq önəmli liderə sahibik. Təbii ki, Müsavat partiyasının başqanı odur və Müsavatın belə güclü olmasında onun böyük rolu var, eyni zamanda biz də bunu böyük uğur sayırıq ki, Müsavatın belə başqanı vardır.

–Müsavatın tarixi köklərini İsa Qəmbərin liderlik keyfiyyətləri tamamladığı üçün Müsavata gəlmisiz?

–Təbii ki, lider kimi Rəsulzadə necə uğurlu seçim idisə, bu gün də İsa Qəmbər uğurlu tendensiyadır.

–Burdan belə bir sual çıxır: Müsavatın başqanı həmin dönəmlərdə İsa Qəmbər olmasaydı, İsa Qəmbər başqa bir partiyanın rəhbəri olsaydı, yenə də Müsavatı seçərdiniz?

–Təbii ki, Müsavatı. O, dövrlərdə Elçibəyin rəhbərlik etdiyi AXCP-də xeyli gənclər təşkilatları var idi və bizim ətrafımızdakı gənclər də ora üzv olurdular. Amma prinsipal olaraq deyirdim ki, Müsavata üzv olacağam. Müsavat bu məsələdə əsas önəmli faktordur, nəinki şəxsiyyət.

–Biz Tural Abbaslını hansı dövrdən Müsavatın Gənclər Təşkilatının sədri kimi tanıyırıq? Sizin sədr seçildiyiniz vaxtda yanılmıramsa, xeyli rəqabət var idi və siz seçiləndən sonra o şəxslərdən çoxu Gənclər Təşkilatından çıxıb getdilər. Necə oldu, bu etibarı necə qazana bildin?

–Məndə bir səhv olub və məndə indi də bu var: mən siyasətdə olan adamlarda təvazökarlığın olmasını səhv hesab edirəm. Baxmayaraq ki, bu gün bir çoxları, hətda hörmət etdiyim şəxslər təvazökarlığı üstünlük sayırlar. Bu da bizim milli dəyərlərimizdən, dinimizdən irəli gəlir. Amma real siyasi vəziyyəti təvazökarlıq və siyasət, təvazökarlıq və biznes, təvazökarlıq və inkişaf sözlərini yanaşı qoya bilmir. Mənim də təvazökarlığım tanınmamağımın əsas səbəbi idi. Mən Müsavatda 2001-ci ildən Gənclər Təşkilatı sədrinin müavini idim. Təşkilatın bütün işlərini, strategiyasını, siyasi kursunu, demək olar ki, mən müəyyənləşdirirdim. İşlərin böyük hissəsini mən həyata keçirirdim. Hətda mənim vasitəmlə siyasətə qoşulan gənclər məndən daha çox tanınırdılar. Amma mən təvazökarlıq etdiyim üçün görünmürdüm. Sonradan gördüm ki, bu səhvdir. Təbii ki, mən bunu kiməsə təbliğ etmək fikrində deyiləm. Mən heç kimə demirəm ki, mən bunları etmişəm, çünki bunları mən öz davam üçün etmişəm.

–Necə oldu ki, görünməyə-görünməyə böyük çoxluğun dəstəyini qazandın?

–Həmin dönəmdə Gənclər Təşkilatında məni hamı dəstəkləyirdi. Şüuraltında hamıda var idi ki, Emindən sonra sədr Tural olacaq. Səhvim o idi ki, iddialı deyildim. Deyirdim ki, buna haqqım varsa, sədrliyə gələcəm. Sonra gördüm ki, bir çox insanlarımız şəxsiyyətə pərəstiş edirlər. Həmin ərəfədə deməzdim ki, böyük çoxluq məni dəstəklədi, cüzi fərqlə üstünlük qazandım. Təqribən 52-47 nisbətində idi. Həmin dövrdə mənim rəqibimin Təşkilatın işlərinə heç bir təsiri yox idi. Sadəcə onu dəstəkləyənlər müəyyən prinsip güdürdülər. Amma məni dəstəkləyənlər səmimi idilər, inamlı idilər, mübarizəmizə görə seçmişdilər. Bizim rəqiblərimiz isə qeyri-səmimi şəkildə birləşmişdilər. İdeyadan, davadan küsmək olmaz. Amma onlarda bu baş verdi. Bu gün mənim istəmədiyim adam seçilmədi deyə, mən partiyadan getməliyəm?

–Rəsulzadənin əsərlərini oxumusunuz? Ən çox sizə təsir edən əsəri hansıdır?

–Hamısını yox. Rəsulzadənin publisistik fəaliyyətini daha çox oxumuşam, jurnalist kimi fəaliyyətini oxumuşam. Və ona sevgimiz heç də onun etdiklərini tam dərk edərək yaranmayıb. Əsasən kor-koranə şəkildə olub sevgimiz. Yəni bayrağımız, dövlətimiz və s. kimi şeylərə görə sevgimiz yaranıb. Deyim ki, onun fəaliyyətini elmi şəkildə tam dərk edərək onu qəbul etmişəm, bu yanlış olardı.

–Müsavatı yaradanlardan biri də Mirzəbala Məmmədzadədir. Onun hər hansı bir əsərini oxumusunuz?

–Onun liberallıqla bağlı, liberal düşüncə ilə bağlı məqalələrini oxudum. Çox əhatəli insanlardır. Kitablarını oxumamışam, əsasən məqalələrini oxumuşam.

–Belə görürəm ki, Rəsulzadə xətasıyla birgə sizin üçün məqbuldur. Elədir?

–Yox, mən elə deməzdim. Biz onu səhvləriylə, düzləriylə birlikdə qəbul etmirik. Hər bir insan tənqidə açıqdır. Hamının yaxşı və yanlış hərəkətləri var. Amma hansının üstünlük təşkil etməsindədir əsas məsələ.

–Ailədə necə, fikirlənizdən dolayı sizə qarşı təzyiq olubmu?

–Xeyr. Mən uşaqlıqdan sözümü deyən olmuşam. Bu ailəmə də sirayət etmişdi ki, mən sözümü deyirəm və keçərlidir sözüm. Amma böyüklərin sözünə də hörmətim var, buna görədə məsləhətlərini dinləyirəm.

–Azərbaycan ailəsində belə bir fikir var ki, mənim övladımdırsa, mən nəzarət edərəm. Azərbaycan hökümətində də belə bir tendensiya var ki, təşkilat yaranarsa, mən yaradacağam. Bəs müxalifətdə necə, belə bir düşüncə varmı?

–Mən yenə də deyirəm, ailə ayrı bir formatdır. Partiya ayrı formatdır. Dövlətin gəncə yanaşması ayrı bir formatdır. Ailədə bəzi xoş niyyətlə yanaşıla biləcək hadisə, dövlətlə gənc arasında olmur.

–Heç gənc olduğuna görə qadağalarla qarşılaşmısan?

–Bizim cəmiyyətdə sovetdən qalan bir ənənə var ki, əgər gəncsənsə, təcrübəsizsən. Bu, partiyada da var. Ancaq bir neçə illərdir biz bunu aradan qaldıra bilmişik. Biz, öz işimizi daha mükəmməl qurmaqla bu tendensiyanı dağıda bilərik. Biz öz etdiklərimizlə bəyənmədiklərimizin yanlış olduğunu göstərə bilərik.

 

“Təbii ki, başqan olacağam, Müsavatın tarixinə bu düşəcək“

 –Rəsulzadəni liberal kimi qiymətləndirirsiz?

 

–Liberal deyəndə, bugünki liberal kimi qiymətləndirmirəm. Qadına səsvermə hüququ verməsi, millətlərə fərq qoymaması, dinlər arasında fərq qoymaması onun liberallığından xəbər verir.

–Hakimiyyətə gəldiyinizdə hər şey gözlədiyiniz kimi olmadı. Bu ola bilər. Proseslər bu yöndə olsa, Tural Abbaslının o zamankı addımları nə olacaq?

–Müsavat partiyasında elə bir mühit yoxdur ki, hazırki hakimiyyətdə bu vəziyyəti yaradan insanlar kimi insanlar yetişsin. Təbii ki, biz deyə bilmərik ki, Müsavatda belə insanlar yoxdur. Amma Müsavatda elə bir mühit yoxdur ki, o cür insanlar söz sahibi olsunlar. Zamanla onlar özləri sıralardan çıxıb gedirlər. Müsavatda özünü tənzimləmə var. Amma dediyiniz kimi olarsa, mən Müsavatın nizamnaməsində deyilən şeyləri həyata keçirəcəyəm.

–Nizamnamə demişkən, Nizamnaməyə əsasən, siz bir dövrdən sonra Müsavat GT sədrliyindən getməli olacaqsınız. Müsavat GT-də sizi əvəz edə biləcək şəxs varmı? Yəni bütün bu təşkilat işlərinin davamını gətirə bilən bir kadr varmı?

–Müsavatın ən ali orqanı Divandır və mən Divanın seçilmiş üzvüyəm. Bundan sonra isə daha yüksək vəzifə başqanlıqdır və vaxtı gələndə bu niyyətlərimiz də olacaqdır.

–İddianız olacaq yəni başqanlığa?

–İnkişaf etməyə meyilli olmayan insandan perspektiv gözləmək anlamsızdır. Təbii ki, başqan olacağam, Müsavatın tarixinə bu düşəcək.

–Tural bəy, mütaliə etməyi sevirsinizmi?

–Təbii ki. Zamanım olan kimi mütaliə edirəm.

–Hazırda oxuduğunuz kitab varmı?

-Corc Oruelin 1984 romanını oxuyuram. Ən çox mütaliə etdiyim dövr Kürdəxanıda təcridxanada olanda olub.

–Deyilənlərə görə Pənah Hüseynlə mübahisəniz olub. Bu, doğrudurmu?

–Bəli, İctimai Palatanın iclasında açıq şəkildə tənqid etdim.

–Başqan sizi barışıq üçün çağırıbmı?

–Barışıq deməyək, çünki aramızda küskünlük olmayıb. Küskünlük ancaq şəxsi münasibətlərdə ola bilər. Bizdə hər həftə Divanın iclası olur, bunun üçün xüsusi çağırmağa ehtiyac yoxdur. Başqanla tez-tez görüşürük. İsa bəy, gəncik deyə bizə məsləhətlərini verir və buna barışığa çağırmaq demək olmaz. Bizi münasibətlərdə daha diqqətli, daha mülayim olmağa çağırır.

–Hazırda təşkilatınızın sədr müavini Nigar Yaqublu həbsdədir. Onun həbsdə olması cəmiyyətdə çox böyük narazılıqla qarşılandı. Müsavat GT ilk vaxtlarda dözümlü davrandı, amma daha sonra Obyektiv TV-də müsahibəndə sərt danışdın. Amma ondan sonra heç bir sərt reaksiya görünmədi. Nümayişlərdə də Nigarın hər hansı bir şəkli görünmədi.

–Aksiyaların, numayişlərin keçirilmə məqsədi var. Buna görə də, "Parlament buraxılsın” şüarı altında keçirilən aksiyada Gülər Əhmədovanın şəkli tutulmalıdır, nəinki Nigar Yaqublunun. İki aksiya Parlamentin buraxılmasına dair olub, biri də cərimələrin qaldırılmasına görə. Buna görə də, bu aksiyalarda Nigarın şəklinin qaldırılması bir az yersiz görünərdi. Əgər praktiki, sərt addım deyəndə aksiyalar nəzərdə tutulursa, biz müxalifət olaraq, Müsavat olaraq sübut etmişik ki, bunları həyata keçirmək bizim üçün çətin bir şey deyil. İstənilən vaxt, günü bu gün belə Müsavata partiyası Nigar Yaqublunu müdafiə etmək üçün aksiya keçirə bilər. Nigar Yaqublunun həbsi siyasi məsələdir. Bu birbaşa onun siyasi mövqeyi ilə bağlıdır. Nigar da aksiyalarda öndə gedirdi. Bildiyiniz kimi, dünya arenasında xanımların mübarizələrdə öndə getməsi daha çox işıqlandırılır, nəinki bəylərin. Və Nigarın da öndə getməsi hakimiyyətdə ona qarşı qisas hissi yaratmışdır. Və bu qəza hadisəsi də hakimiyyətə bəhanə verdi Nigarın həbsi üçün. Bu həbs hadisəsi 20 ildə monolit siyasət aparan iqtidarın içində belə parçalanmalara səbəb oldu. Mən Nigar Yaqublunun həbsi üzərindən siyasət aparılmasını istəmirəm. Bildiyiniz kimi, aksiyalar bir partiyanın siyasi gedişində müəyyən rol oynayır, o partiyanın təbliğidir bir növ. Mən istəmirəm ki, biz Nigar Yaqublunun həbsi üzərindən bunları edək. Burda qadın predmeti vardır. Biz vicdan məhbusları olmuşuq. Biz mübarizə aparmışıq deyə bu qədər vicdan məhbusu var. Amma Nigar Yaqubludan bu yöndə istifadə olunmamalıdır. Düşünəndə ki, hansısa aksiya Nigarın məsələsində mənfi rol oynayar, biz bunu keçirmək fikrində deyilik.

–Düşünürəm ki, bundan sonra bir illik proses ərzində əsas fikir prezident seçkiləri olacaqdır. Müsavat başqanı açıqlama verdi ki, namizədliyini verəcək. İctimai Palata vahid namizədlə gedəcək, yoxsa Müsavat öz namizədi ilə gedəcək? Necə düşünürsünüz?

–Yaxşı olardı ki, İctimai Palata Müsavatın namizədini vahid namizəd kimi irəli sürsün. Bunun həm cəmiyyət üçün, həm də İctimai Palata, həm də proseslərə xeyri olardı. Amma İctimai Palatanın formatını düz şərh etmirlər. İctimai Palatanın yaranma məqsədi parlament seçkilərində saxtakarlıqlara qarşı namizədlərin birləşməsindən ibarətdir. Bunun əsas hədəfi saxta yolla seçilmiş parlamentin buraxılması və yeni parlament seçkilərinin keçirilməsidir və İP-də partiya təmsilçiliyi yoxdur. Burda fərdlərin təmsilçiliyidir. İP üzvləri partiya olaraq verdiyi hər hansı bir qərarı İP ilə razılaşdırmalıdır deyə bir qanun da yoxdur. Yəni Müsavat atacağı hər hansı bir addımı İP ilə razılaşdırmağa məcbur deyil. Amma partiyaların öz namizədlərini irəli sürməsi ilə cəmiyyətdə belə bir fikir formalaşarsa ki, İP dağıldı, müxalifətin birliyi dağıldı, bunun qarşısını almaq üçün İP-də belə qərara alındı ki, Palata vahid namizədlə deyil, vahid seçki platforması ilə çıxış etsin və bunu Koordinasiya Şurasının üzvləri də bir neçə dəfə qeyd ediblər

–Belə başa düşdüm ki, Müsavatın öz namizədinin olması lehinəsən.

–Lehinəyəm və bu gün mən bunu GT sədri olaraq demirəm, bir Divan üzvü kimi deyirəm. İstənilən halda, Müsavatın öz namizədi ilə getməyinin tərəfdarıyam və bunun üçün həm siyasi, həm də təbliğat mübarizəmi aparacağam. Bu, mənim yanaşmamdır və digərlərinin buna necə yanaşması mənə maraqlı deyil.

–İsa Qəmbərin qalib olacağından əminsiniz?

–Mən başqanıma inanıram və bir şeyi vurğulayım ki, hər kəs öz namizədliyini irəli sürsün. Amma sona kimi rəqabət apara biləcək namizəd bizim başqan olacaq.

–Seçkilərdə qalib gəlmədiyiniz təqdirdə necə olacaq?

–Azərbaycanda seçkilərdə qalib gəlməməyin iki yolu var: ya səs vermirlər uduzursan, ya da səs verirlər, amma o səslər realizə olunmur və uduzursan. 2003-cü ildə seçki uğrunda çox mübarizə apardıq, axıra qədər getdik. Bu seçkilərdə də üzərimizə düşən vəzifəni axıra qədər yerinə yetirəcəyik.

–Belə bir fikir var ki, 2013-cü il seçkilərində müxalifətin qalib gəlməyəcəyi təqdirdə cəmiyyət daha böyük bir inamsızlığa düşəcək və müxalifət elektoratını itirəcəkdir. Bu barədə nə düşünürsüz?

–Azərbaycanın müstəqil siyasi arenasının formalaşması 20 illik bir dövrü əhatə edir və bu dövrdə keçirilən bütün seçkilərdə deyirlər ki, bu seçkidə qalib gəlməsə müxalifət, inamsızlıq yaranacaq, ruh düşkünlüyü olacaq. Bu da cəmiyyətimizin siyasəti tam başa düşməməsinə görədir. Siyasət strateji uzun bir yoldur.

–Amma razılaşaq ki, müxalifətin 2003-cü ildəki elektoratı ilə hazırki elektoratı eyni deyil.

–Bu, ondanmı irəli gəlir ki, müxalifət hakimiyyətə gələ bilmir, yoxsa hakimiyyətin müxalifəti yox etmək üçün repressiv addımlar atır?

–Gənclər Təşkilatlarından hansıları ilə əlaqələriniz yaxşıdır?

–Hamısı ilə. Bizim heç biriylə problemimiz yoxdur. Gəncsənsə, normal münasibət varsa, normal da yanaşırıq. Heç kimlə fərdi qaydada problemimiz olmur.

–Siyasətdə yaşlılarla gənclərin fərqini ortaya qoyanda, mənə elə gəlir ki, gənclər bir-biriləriylə daha çox münasibət qururlar. Bununla razısız?

–Təkcə gənclərə aid etməzdim. Bulvara çıxsaz yayda, görə bilərik ki, yaşlı siyasilər müxalifət və iqtidar mənsubları yanaşı gəzirlər, yanaşı otururlar.

–Bəs televiziyalarda niyə bir-birilərini bu qədər təhqir edirlər?

–Təhqir deməzdim, tənqid edirlər. Siyasətdə səmimiyyət axtarmaq nə qədər düzgündür, sizcə?

–Siz deyirsiz ki, siyasətdə səmimiyyət olmur?

–Bilirsiz, siyasət seçicilərin səslərini almağa hesablanmış bir oyundur.

–Varmı, yoxmu, necə bilirsiz?

–Mən bilsəm ki, səmimiyyət seçicilərin səsini mənə qazandıracaq, mən səmimi olaram. Qeyd edim ki, mən praqmatikəm.

–Qərbin aparıcı siyasi ekspertləri vurğulayırlar ki, siyasətin ən böyüyü səmimiyət üzərində qurulub. Bizim gənclər niyə daha çox kuratorluğa meyillidirlər? Öz sözlərini özləri demirlər, yada demək istəsələr belə kiminsə diktəsi ilə deyirlər. Nəyə görə bir dənə gənc nazirimiz yoxdur, ya da müxalifətdə bir gənc partiya lideri yoxdur? halbuki, Azərbaycanın 60%-ini gənclər təşkil edir.

–Bu məsələdə belə reallıq var: azadlıq verilmir, azadlıq alınır. Bu gün mən gedib bir idarəyə desəm ki, mən gəncəm, məni müavin etməlisən, nazir etməlisən, ya da sədr seçməlisən, yaşlı deyər ki, gəl sağlam mübarizə aparaq, qalib gəl, gəl keç yerimə. Yəni siyasət mübarizə meydanıdır.

–Tural Abbaslı indiki şəraitdə öz mübarizəsini aparıb. Vaxtı gəldikdə haqqı olan yer üçün mübarizəsini aparacaq?

–Əlbəttə. Bu gün araşdırsaz, görərsiz ki, Müsavatın Divanında ən gənc üzv mənəm. Müsavatın strukturundə gənclərin ən çox üstünlük təşkil etdiyi dövr indiki dövrdür.

–Amma təfəkkür dəyişmir, Tural bəy. 1980-ci illərin şəraitindən ortaya çıxan liderlər oldu. 20 illik bir dövr keçdi. Biz o vaxtdan bu yana eyni simaları görürük, müxalifətdə də, iqtidarda da. 20 illik bir dövr siyasi arenanı dəyişmək üçün kifayət qədər zaman deyilmi?

–Niyə zamanı deyil? Mən soruşsam ki, Müsavat GT-dən neçə nəfəri tanıyırsız, siz 5-nin adını ən azı çəkə bilərsiz. Amma 5 il öncə bu belə deyildi.

–İntellektual baza nə qədərdir?

–İntellektual baza çox ola bilər. Amma bunların hamısı da lider olacaq bir tendensiya yoxdur.

–Sizin strategiyanızı kim qurur?

–Özümüz qururuq, öz hədəflərimizi özümüz müəyyənləşdiririk.

–Tanınmaq cəmiyyəti inandırmaq üçün kifayət edir?

–Əgər siyasi arenada tanınırsansa, demək ki, sən izlənilmisən, oxuyublar səni, buna görətanınırsan. Məncə, kifayət edir.

 

“Təbii ki, başqan olacağam, Müsavatın tarixinə bu düşəcək“

 –Sizin fərqiniz nədir? Hansı fikirləri deyirsiniz? Demokratiyadan, hüquq pozuntularından digərləri də danışır. Sizin fərqiniz nədir?

 

–Deyiləcək şeyləri yenidən deməyin anlamı yoxdur. Bizim üzərimizə düşən şey deyilənlərin həyata keçirilməsidir.

–Niyə elə düşünürsünüz ki, yeni bir şey ortaya qoyulmursa, bundan sonra da qoyula bilməz?

–Siyasi-ictimai sferada nə yenilik ola bilər? Bütün ideologiyalar ortaya qoyulub. Yeni nə qoyula bilər ki? Mən inanmıram ki, insanları xoşbəxt etmək üçün bundan artıq nəsə etmək olar.

–Biz deyirik ki, insan haqları pozulur, korrupsiya var, ədalətsizlik baş alıb gedir. Bunlara görə bu hakimiyyət getməlidir. Dəyişdik hakimiyyəti, biz gəldik. Sabah bizim də diktatura çevrilməyəcəyimizə heç kim zəmanət verə bilməz. Demək istədiyim odur ki, hansı ideya ilə gəlmək lazımdır? Müstəqil Azərbaycanın 20 illik bir ömrü var, bu dövrdə biz heç bir yeni şey ortaya qoya bilməmişik. sanki qabağımızda bir baraj var. Heç kim onu aşa bilmir. Biz ideyadan daha çox "hakimiyyəti devirək” şüarı ilə niyə ortaya atılırıq?

– Bizim missiyamız var. Tarixdə Müsavatın üzərimizə qoyduğu missiya var. Yanaşma fərqi var – 1992-93-cü illərdə indi üzdə olan şəxslərin, İsa Qəmbərin, Əli Kərimlinin yaşı az idi, gənc idilər. Bir çox islahatlar həyata keçirdilər. Amma post-kommunizm düşüncəsini yıxa bilmədik. Yenə şüarçılıqla hakimiyyətə gəlməyə çalışırıq. Siyasət şüar üzərində qurulub. Biz şüarlarımızı deyirik ki, hakimiyyətə gəldikdə bunları edərəm. Amma hakimiyyətə gələndən sonra bunları yerinə yetirməsəm, o ayrı.

– İdeyasız iqtidar olmaq Azərbaycanı xilas edəcək?

Mən ideoloji cəhətdən şərqə daha yaxınam. Qərb üçün əsas məqsəd xoşbəxt yaşamaqdır.

Şərhlər : 1 Şərh yaz
Vasmoy usaqi 10 dekabr 2012 19:18  
Salam Eziz oxucular men tarixim boyu bele gozel ve ideyali suallar gormemiwdim. cox gozel alinib.Her kese uqurlar
İnformasiya
Ola bilər ki, ancaq gün ərzində saytda xəbərlərə şərh əlavə etmək 600 nəşr günündən sonra olsun.
Xəbər lenti